Дуурайгчдын хуудаснаас ихэд эмээжээ

Хэн нэгэн нь таны хийсэн болгоныг дагаж мөшгөөд, өчүүхэн ч зүйл алдалгүй дагаж дуурайна гэдэг яаж ч бодсон таагүй зүйл. Хаана ч явсан хамт гэж мэдээрэй гээд нэг хүн сэм ажиглаад дагаад, зураг хөргийг чинь дараад байна гэсэн сайхан зүйл биш, тэр тусам чи од биш, олны танил биш бол бүр ч эвгүй.

Лорен Буллен гэгч бүсгүй яг ийм явдалтай таарчээ. Тэрээр найз залуугийн хамтаар маш олон орноор аялдаг, энэ тухайгаа олон нийтийн сүлжээнд зураг хөргөө хангалттай олон байршуулдаг аж. Гэтэл нэг өдөр интернэтээр хэсч байгаад өөрийнх нь явсан орсон улс болгоноор нэгэн эмэгтэй яг дуурайж аялаад, яг адил зураг даруулдаг болохыг олж мэдээд ихэд цочирдсон байна.

Буллений амарч байсан зочид буудал, зураг авахдаа дарсан өнцөг, өмссөн хувцас, чимэг зүүлт гээд гээд бүгдийг яг адил дуурайсан байж. Ганц ялгаа нь гэвэл Буллен цайвар бүстэй бол нууцлаг дуурайгч бүсгүй нь хар үстэй.

Та өөрөө хараад, харьцуулаад үз. Адил зураг авч болох ч яг адил усны хувцастай, яг адил байдлаар хэвтсэн энэ тэр гээд дэндүү адил байгаа нь шууд нүдэнд тусна.

Лорен Буллен ийм аймшигтай бас гайхалтай нээлт хийсэн даруйдаа найз залуугаа сэрээн бөөн эрэл хайгуул хийж эхэлсэн байна. Блог дээрээ реклам сурталчилгаа байршуулж бас ч гэж тав гурван зоос хийдэг болохоор сурталчилгааг нь булаах гэсэн хүн дуурайгаад байна гэж боджээ. Гэтэл тийм зүйл байсангүй. Уйгагүй хайсны эцэст нь дуурайгч хос нь Грек, Испани, Марокко, Ром зэрэг газруудад өөрсөдтэй нь яг адил авахуулсан 20 гаруй дуураймал зураг олоод бүр ч гайхсан байна.

Улмаар Лорен бүсгүй энэ нээлтийнхээ талаар сэтгэгдлээ бичихэд дийлэнх хүмүүс түүнийг болгоомжлуулсан анхааруулсан тайлбар хийжээ. Учир, хэн нэгнийг ингэтэл дуурайна гэдэг нь сэтгэцийн хүнд эмгэгийн шинж тэмдэг байж болно гэж олонх хүн үзсэн байна. Иймэрхүү зөвлөгөө тайлбар сонссон Лорен нууцлаг дуурайгчийнхаа хаягаар захидал бичиж тайлбар шаардсан ч хариу аваагүй. Иймд тэрээр өөрийг нь дуурайсан элдэв зургийг аюул, заналхийлэл гэж хүлээж авахгүй, цаашид ч найз залуугийн хамт аялж, зургаа оруулсаар байх болно гэжээ.