Урам зориггүй болсон үед хань болох 6 ЗӨВЛӨГӨӨ

Болно, чадна гэдэг бодлоор ажлаа дуусгах урам авч сэтгэлээ сэргээх үе зөндөө. Гэтэл заримдаа энэ үгс урам өгөхөөс илүү дарамттай санагдаж, хамаг зориг унтраачихдаг үе тохиож байсан уу? Хийх ёстой зүйлсээ бодох төдийд л шантарч, яаж дуусгана даа гэж суусаар байтал гарсан үр дүнгүй ядарч байгаа бол та энэ зөвлөгөөг уншаарай.

Өөрийн үнэт чанаруудыг сайшаах

Заавал загнаж байж л үр дүн гардаг мэт өөртөө их хатуурхаж байна уу? Иймхэн зүйлийг чадахгүй, үүнээс цаадахыг яаж давах юм гэх мэтчилэн өөрийгөө “унтраах” хэрэггүй. Түүний оронд өөрийнхөө сайн хийж чадах зүйлээ эргэцүүлж, тохирох сайхан үгсээр урам өгөх нь хавьгүй үр дүнтэй. Мөн дотны найзаасаа өөрийнхөө сайн зан чанаруудыг асуувал чиний огт анзаарч байгаагүй зүйлсийг хэлэх вий.

10 минутын дүрэм

Ямар ч ажлыг эхлүүлсэн төд удалгүй залхуу хүрч, эхлэхээс цааш ахихгүй байвал “10 минутын дүрэм”-ийг хэрэгжүүлээд үзээрэй. Үргэлжлүүлж ажлаа дуусгая гэхээр нэг л явж өгөхгүй байвал яг 10 минутын дараа завсарлая гэж өөртөө хэлээд залхуурч хойш суухын оронд үргэлжлүүлэн ажиллах энгийн арга юм. Ингээд 10 минут өнгөрч амрах үедээ “Би үнэхээр амармаар байсан уу эсвэл зүгээр л залхуурсандаа болимоор санагдсан уу” гэж өөрөөсөө асуугаарай. Хүмүүс ихэвчлэн залхуурснаа ойлгоод цааш ажиллах урам зоригтой болсон байдаг юм.

Бодлоо цэгцлэх энгийн бөгөөд үр дүнтэй арга

Өглөөний цэвэр тунгалаг агаар, ээх нарны дотно дулаан иэдрэмж, борооны өмнөх болон дараах үнэр гээд байгалийн ид шид дуусашгүй. Ямар ч хариултгүй, гацсан үедээ та гэрийнхээ хажуу дах цэцэрлэгт эсвэл хүн багатай явган замаар 10 минут салхилж тархиа амраахыг зөвлөе. Үүлсийн нүүдлийг ажиглаж, шувуудын жиргээг анзаарч явахад аяандаа тайвширч, бодол цэгцрээд ирнэ.

Өөрөө цаг гаргах

Нойр муутай хонох, шим тэжээлтэй хоол идэхгүй, өөртөө чанартай цаг гаргахгүй байхгүй үед бид амархан бухимдаж, ихэнх зүйлд сөргөөр хандаж эхэлдэг. Ийм үед урам зоригтой байх бүр ч хэцүү санагдана. Тэгэхээр ямар ч үед:

• Өөрт тохирох дасгалын хуваарь гаргах
• Шөнө нойроо бүтэн авах
• Ус ууж хэвших, шим тэжээлтэй хоол идэх
• Өөрийнхөө дуртай, сонирхдог зүйлд цаг гаргах
• Стрессээ тайлах эрүүл зуршилтай болох нь зүйтэй.

Амьдралын буруу хэвшлүүдээ цэгцлэх зэрэг өдөр тутмын үйлдэлдээ анхаарснаар санаа зовох зүйл ч багасаад ирнэ.

Өдөртөө дуусгах ажлын жагсаалт гаргах

Дуусашгүй их ажлыг нэг өдөрт оноочихоод, түүндээ түүртэж байгаа юм биш биз? Нэг дор ихийг амжуулахаас илүү өдөр бүр тогтсон хуваариар ажиллах нь өөрт илүү амар бөгөөд хамаагүй үр дүнтэй байж мэднэ. Орой унтахдаа маргааш гүйцэтгэх ажлаа жагсааж бичсэнээр өглөө сэрэхэд хийх зүйлс ойлгомжтой, тодорхой байх болно.

Яагаад урам зориггүй байгаа шалтгаанаа бодож үзэх

Магадгүй та төгс үр дүн гаргах гэсэн хүлээлт үүсгэчихээд түүндээ хүрэхгүй байх вий гэж айж суугаа биш биз? Эсвэл хэчнээн хичээсэн ч үнэлдэггүй, үргэлж шийдэлгүй шүүмжилдэг байгууллагад ажилладаг уу? Урам зоригтой байх хэрэгтэй гэж өөрийгөө хүчлэхийн оронд яагаад идэвхгүй болсон шалтгаанаа бодоод үзээрэй.