Өсөлтгүй жирэмслэлт буюу чимээгүй зулбалт

Сүүлийн үед бүсгүйчүүдийн дунд түгээмэл тулгамдаж буй асуудал бол өсөлтгүй жирэмслэлт буюу зулбалт юм.

Ойролцоогоор 8 жирэмслэлт тутмын 1 нь зулбалтаар төгсдөг байна. Нас ахих тусам зулбалт тохиолдох магадлал нэмэгдэх бөгөөд:

  • 30-аас доош насны 10 жирэмсэн эмэгтэй тутмын 1 нь
  • 35 – 39 насны 10 жирэмсэн эмэгтэй тутмын 2 нь зулбалтаар төгсдөг бол
  • 45-аас дээш насны 2 жирэмсэн эмэгтэй тутмын 1 нь зулбадаг гэсэн мэдээллүүд байдаг.

Өсөлтгүй жирэмслэлт гэдэг нь эхийн умайд (саванд) бойжиж буй ургийн (хүүхдийн) өсөлт хөгжил зогсон, улмаар цаашид тээлт хэвийн үргэлжлэх боломжгүй болж, ураг эндсэн байхыг хэлдэг. Энэ үед эмэгтэйчүүдэд хэвлийгээр хүчтэй базлуулах, доошоо их хэмжээтэй цус гарах гэх зэрэг шинж тэмдэг төдийлөн илэрдэггүй учир “Чимээгүй зулбалт” гэж нэрлэх нь ч бий.

Өсөлтгүй жирэмслэлтэд хүргэж болох олон төрлийн шалтгаан байж болох ч дийлэнх тохиолдолд үр хөврөлийн (хүүхдийн) хромосомын хэвийн бус өгөгдлөөс хамаарсан байх магадлалтай гэж үздэг. Иймд бүрэн урьдчилан сэргийлэх боломж байдаггүй. Гэвч өсөлтгүй жирэмслэлтийн дараа дахин жирэмсэлсэн хүмүүсийн 90% хэвийн жирэмсэлж, хүүхдээ төрүүлдэг байна.

Улаанбаатар хотын оршин суугчдын хувьд хүйтний улиралд, агаарын бохирдол хэт өндөртэй орчинд ажиллаж амьдардаг. Гэтэл Lancet, Nature зэрэг дэлхийн нэр хүнд бүхий шинжлэх ухааны сэтгүүлүүд агаарын бохирдол нь жирэмсний эрт үеийн хүндрэл, зулбалт үүсэхэд нөлөөлж байгаа талаарх судалгааны ажлуудыг нийтэлсэн байна. (Tao Xue, 2021; Liqiang Zhang, 2019).

Жирэмслэхээр төлөвлөж буй хосууд, бүсгүйчүүд өөрт учирч болох эрсдэлээс урьдчилан сэргийлэхийн тулд хорт зуршлаас татгалзах хэрэгтэй. Мөн эмчийн зааврын дагуу фолийн хүчил ууж, Д амин дэм болон бусад төрлийн аминдэмийн дутагдлаас сэргийлэх нь зүйтэй.Мөн олон нэр төрлийн хүнсний бүтээгдэхүүн, шинэхэн жимс, ногоог өдөр тутамдаа хэрэглэж эрүүл тэнцвэртэй хооллож, өөрт тохирсон дасгал хөдөлгөөнийг тогтмол хийж хэвшиж, зөв нойрны хэмнэлтэй байх нь хувь хүний өөртөө болон гэр бүлдээ оруулж буй үнэтэй хөрөнгө оруулалт юм. 

SOURCE: ikon.mn

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.