30-ААД НАСНЫ ЭМЭГТЭЙЧҮҮД ӨӨРТӨӨ ИЛҮҮ ИТГЭЛТЭЙ

Бүсгүйчүүд 18-19 настайгаасаа илүү 27-33 насандаа өөртөө илүү итгэлтэй болдог болохыг Британийн социологичд саяхан явуулсан судалгаагаараа тогтоосон байна. Санал асуулгад оролцогсдын олонх нь бүсгүйчүүдийн дур булаам гоо үзэсгэлэнгийн оргил үе энэ насанд тохиодог гэжээ.

Британийн мэргэжилтнүүд 4000 хүнийн дунд санал асуулга явуулж, бүсгүйчүүд 33 нас хүрэхдээ дур булаам гоо үзэсгэлэн нь ид цэцэглэдэг гэсэн дүгнэлтэд хүрчээ. Санал асуулгад оролцогсдын 70 хувь нь эмэгтэйчүүдийн өөртөө итгэлтэй байдал нь дур булаам болгодог гэсэн бол 67 хувь нь гадаад үзэмж болон галбир, 47 хувь нь хэв маягийн мэдрэмж нь бүсгүйчүүдийг дур булаам болгодог тухай «Telegraph» сонинд бичсэн байна.

Дээрх санал асуулгад оролцогсдын бараг гуравны хоёр хувь нь нас ахих тусам гоо үзэсгэлэнтэй болдог гэдэгтэй санал нэг байгаагаа нотолжээ. Бараг тал хувь нь өсвөр насанд тохиолддог элдэв асуудлаас цагийн явцад ангижирч, илүү гоо үзэсгэлэнтэй болдог гэсэн байна.