АЖЛЫН НАЙЗ ГЭЖ ТАНИЛЦУУЛСАН ЭРЭГТЭЙТЭЙГЭЭ НУУЦ АМРАГУУД БАЙСНЫГ МЭДЛЭЭ…

Өдрийн мэнд залуусаа. Би нэгэн олны танил бүсгүйтэй үерхээд жил хагас болж байна. Олны танил болохоор нь түүний тухай элдэв янзын цуу яриа, шар мэдээ, элдэв зураг интернетээр зөндөө л байдаг юм. Би анхнаасаа л хүлээцтэй хандаж, ойлгож, өнгөрсөн амьдралыг нь сөхөхгүйг хичээж ирсэн. Би өөрөө эмнэлгийн салбарт ажилладаг жирийн нэг залуу л даа.

Гэтэл сүүлийн хэдэн сар нэг зүйл миний сэтгэлийг маш их чилээх боллоо. Найз бүсгүйд маань анхнаасаа л ‘Ажлын шугамаар холбоотой, миний гэмгүй сайн найз’ гэж надад танилцуулж байсан нэг залуу байдаг юм. Гэтэл нэг удаа би утсыг нь дуугарахаар нь авч өгөх гээд санаандгүй ирсэн зурвасыг нь уншчихсан юм. Харамсалтай нь тэр залуу миний сайн таньдаг хүн байж таарсан бөгөөд цаанаа эхнэр, хүүхэдтэй.

Зурвас дээр нь ‘Сайхнаа, хайртай, үнсье’ гээд л араас нь гүйгээд, уулзахыг хүсэж бичсэн байсан. Би эхэндээ тоолгүй өнгөрөөсөн ч олон сарын дараа ахиад харахад харилцаа нь үргэлжилсээр л байв. Асуудлыг лавшруулж шалгатал миний найз бүсгүй бид хоёрыг танилцахаас ч өмнө тэд бие биенийхээ нууц амраг байж. Олон хүний хажууд огт танихгүй хүмүүс шиг хол хөндий харагддаг байсан нь ерөөсөө л харилцаагаа нуух гэсэн арга байж л дээ.

Би тэр залуу дээр өөрөө очиж, дахин ийм зүйл давтахгүй байхыг хатуу анхааруулсан. Тэр залуу ч хүлээн зөвшөөрч ухаарсан. Мөн найз бүсгүйдээ ч уурлаж, “Анхнаасаа надад үнэнээ хэлчихсэн байсан бол би хардахгүй, зөв ойлгох байсан” гэдгээ ойлгуулсан. Биднийг үерхэж эхэлснээс хойш тэдний хооронд сексийн харилцаа байгаагүйг би мэдсэн. Одоо ч тэд гарцаагүй харилцаагаа таслахаас өөр аргагүй болсон.

Гэвч миний сэтгэлд маш том сэв суучихлаа. Энэ итгэл эвдэрсэн байдал сэтгэлээс ерөөсөө гарахгүй юм. Салъя гэвэл надад цаашдаа өөр сонголт, боломж зөндөө л олдоно. Гэхдээ би түүндээ үнэхээр хайртай. Одоо би яах ёстой вэ? Зөвлөөд өгөөч.