ЭР ХҮН ЦАГАА ТУЛБАЛ ЕР НЬ Л ГАНЦААРАА ШҮҮ ДЭЭ…

Сайн байцгаана уу? Орой ажил тараад гэртээ шууд оролгүй, машиндаа хэсэг хугацаанд ганцаараа сууж байгаад гэртээ ордог нэлээн олон залуусыг анзаарлаа. Бас “Нөхөр маань нойл орчихоод гарч ирэхгүй юм” гэж гомдоллон бичсэн эмэгтэйчүүдийг ч зөндөө харж байлаа. Хэд хоногоор найзуудтайгаа хөдөө явлаа, загасанд явлаа гээд явчихдаг залуучууд ч цөөнгүй байдаг.

Ингээд дүгнээд харахаар ер нь эрэгтэй хүнд жаахан ч гэсэн хувийн орон зай, ганцаараа сууж юм бодох, сэтгэл зүйгээ амаржаах боломж маш их хэрэгтэй байдаг юм шиг байна. Тэр хувийн орон зайгаа тэд нойлын өрөөнөөс, машиндаа ганцаараа суухаас, эсвэл эзгүй хээр ганцаараа байхаас хайгаад байдаг юм болов уу.

Эмэгтэйчүүд бол найзуудаараа суугаад, сэтгэл доторхоо уудалж ярилцаж байж стрессээ тайлдаг байх. Харин эрэгтэй хүн бол цагаа тулахаар ер нь л ганцаараа шүү дээ. Сэтгэлийн доторх ачаагаа ганцаараа л үүрч, ганцаараа л даван туулахыг хичээдэг.

Эмэгтэйчүүддээ зориулж хэлэхэд: Залуусаа хааяа нэг ганцаараа байж, толгойгоо амраах гэж байхад нь битгий хардаж сэрдээд, эсвэл дэмий зүйлд буруутгаад байгаарай. Тайван орхиж, тэр жаахан хувийн орон зайг нь олгож байгаарай даа.