СҮҮЛИЙН 5-6 ЖИЛ НӨХӨРТЭЙ МӨРТЛӨӨ АМЬД ҮХДЭЛ МЭТ АМЬДАРЧ БАЙНА…

Сайн байцгаана уу? Би одоо 40 хүрч яваа жирийн нэгэн эмэгтэй, ээж, эхнэр хүн байна. Би өөрөөсөө 7 ах хүнтэй ханилаад 20 жил болжээ. Энэ хугацаанд 4 сайхан үрийн ээж болсон. Гэвч сүүлийн 5-6 жил нөхөртэй мөртлөө хайр халамж, дотно харилцаагүй, яг л амьд үхдэл мэт амьдарч байна.

4 дэх хүүхдээ гаргаснаас хойш нөхөр маань надтай ойртохоо больчихсон юм. “4 төрөөд жин нэмчихсэн болохоор намайг сонирхохоо больчихсон юм болов уу” гэж бодоод өөртөө их анхаарсан. Алдарт ээжийн одонгоо авахдаа жингээ хасаж, үнэхээр сайхан болсон ч нөхрийн хандлагад нөлөөлсөнгүй. Бид хоёр энэ талаар зөндөө ярилцсан, би өөрөө ч маш их хичээж, эмнэлэг, домлогоор хүртэл явж үзлээ. Ямар ч арга байхгүй юм байна. Эрэгтэй хүн хүсэл сонирхолгүй болохоороо тэвэрч унтахаа хүртэл больчихдог юм байна.

Би үнэхээр сэтгэлийн тэсвэр алдарч байна. Ийм зүйлтэй тулгарч байсан хүмүүс байдаг байх. Та бүхэн яаж даван туулсан бэ? Надад хэрэгтэй зөвлөгөө өгөөч. Ийм асуудлаас болж ханиа хуурч, өөр хүнтэй уулзах бодол надад огтхон ч байхгүй.