Нөхөр маань намайг хүсдэггүй, одоо бид хоёр секс хийгээгүй 6 сар…

Сайн байцгаана уу? Би өөрийнхөө амьдралын нэг унтарсан хэсгийг ярих гэсэн юм. Та бүхэн зөвлөгөө өгөөрэй.

Нөхөр бид хоёр амьдраад 6-8 жил болж байна. Нэг хүүтэй, хүү маань 2 настай. Хоёр дахь маамуу маань 6 сартай хэвлийд минь бойжиж байна. Анхны төрөлт 30 гарч нэлээд хожуу байсан тул хоёр дахийг нь ойрхон гаргая гэж бодоод хуанли харж байгаад олсон юм.

Юун тухай вэ гэхээр, бид хоёрын сексийн амьдрал таг унтарчихлаа. Нөхөр маань ер нь л сексийн идэвх муутай хүн үү, эсвэл намайг хүсдэггүй юм уу, эсвэл эрүүл мэндийн асуудал байна уу, бүү мэдэх. Энэ сэдэвт их хаалттай, ярих дургүй байдаг. Хүүхэдтэй болохоос өмнө ч тэр нэг хийхдээ 1 л удаа хийнэ, дахиж хийдэггүй, тэгээд л ханачихдаг. Давтамж нь 7-10 хоногт 1-2 удаа байсан.

Би өөрөө сэрэл өндөртэй, секс хийх дуртай эмэгтэй л дээ. Донтой хүн шиг үргэлж нөхрөө хоргоогоод байхаар өөрт тухгүй, эвгүй юм. Эр хүн өөрөө эхэлж үйлдэл хийхгүй, сэдэлгүй байхаар сүүлдээ надад асуудал байна уу, би гологдоод байгаа юм болов уу, намайг эмэгтэй хүний нүдээр харахгүй байгаа юм шиг санагдаж, бухимдаад өөртөө итгэлгүй болж гонсгор байдаг боллоо.

Анхны хүүхдээ төрүүлснээс хойш бүр унтраад 1-2 сардаа 1 удаа хийдэг болсон. Би ч төрсөн эмэгтэй хүн гээд маш их санаа зовж, эмзэглэж, “Нөхөр маань надад сэтгэл хангалуун бус болчихож, төрөөд сунаад мэдрэмж өгөхөө больчихож” гэж их хямардаг байлаа. Ярилцъя, зөвлөе гэж янз бүрээр үзсэн ч үр дүн байхгүй, тодорхой ахиц гараагүй. Сүүлдээ зүгээр л ажиглая гэсэн бодолтой болсон.

Эрэгтэй хүний хэрэгцээ, хүсэл нь байгалиасаа ойрхон байдаг шүү дээ. Хажуудах эмэгтэйгээ буюу эхнэрээ хүсэх сэрэл, мэдрэмж нь онцгой байдаг гэж би боддог. Гэвч миний амьдралын туршлага тийм биш байна. Нөхөр маань намайг хүсдэггүй, одоо бид хоёр секс хийгээгүй 6 сар болж байна. Хүүхдээ олсноос хойш дахиж ойртож үзээгүй.

Тэгсэн мөртлөө шөнө нойтон зүүдэллээ гэдэг, бас шөнө унтаж байхад эрхтэн нь чангараад босчихсон байдаг. Ингээд бодохоор сэрэл мэдрэмж нь хэвийн хүн. Гэвч эр хүний санаачилга, эхнэрээ өдөж хоргоох, хүсэж байгаагаа илэрхийлэх зүйл юу ч байхгүй.

Бид хоёр бусдаар бол сайхан л гэр бүл. Гэхдээ нөхөртөө гологдсон, өөрийгөө эмэгтэй хүн гэж байхгүй байгаадаа маш их сэтгэл гонсгор байна. Сүүлдээ хүслээ илэрхийлэхээ больж, улам дотогшоо хаагдаж, өөрийгөө барьж тэвчин, гар хангалга хийж байна даа. Энэ яг ямар шалтгаан, ямар асуудал байна вэ? Ямар гарц байна вэ?