Тайландад л бага насны охид биеэ үнэлдэг

Саявтархан Монгол Улсын Үндэсний Статистикийн Хороо, Олон Улсын Хөдөлмөрийн байгууллага хамтран нэгэн том судалгаа хийжээ. “Биеэ үнэлэгч болон бэлгийн мөлжлөгт өртсөн хүүхдийн судалгаа” гэсэн нэртэй. Уг нь нууцлаад байхаар судалгаа биш ч, дарга даамалд нь хүрч байж олж авлаа. Их сайн хийгдсэн судалгаа юм. Нууцлаад байсан зүйл нь хэдэн хүний нэр бичигдсэн болохоор тэр гэсэн. Гэхдээ тэдгээр нэр тухайн “хүн наймаалагч”-дын жинхэнэ нэр нь биш, тухайн хүрээнийхэн дотроо ашигладаг нууц нэр, хоч л юм байна лээ. Тухайлбал Бүргэд, Сорвит, Барзаак…, Бүдүүн…, Шулга…, Бялзуухай, 49… гэх мэтээр бичигдэж. Хууль бус үйлдэл хийж, бага насны охидыг бузарлаж буй эдгээр этгээдүүдийн нэр хүндийг хамгаалах уу? цаана нь эхийнхээ өврөөс гараагүй шахам насандаа бусдад хүчиндүүлж, бузарлуулж, хүн худалдаалах гэмт хэргийн золиос болсон охид хүүхдүүдийг татаж авах уу гэдэг их л зөрүүтэй асуудал буй заа. Судалгаанд хамрагдсан охидын ихэнх нь зодуулж, хүчиндүүлж, дарамтлуулан хүчээр биеэ үнэлдэг болохоо хэлсэн байна. Бэлгийн мөлжлөг гэж үүнийг нэрлэдэг юм байна.

СУДАЛГААГ НЭГ НЬ СОНИРХУУЛААД НӨГӨӨ НЬ СОНИРХООД ӨНГӨРЧ БОЛОМГҮЙ

Судалгаагаар нийт 4683 биеэ үнэлэгч болон бэлгийн мөлжлөгт өртсөн хүүхэд хамрагдсан байна. Гадаадад хичнээн ч охид ийнхүү худалдаалагдаж явааг бүү мэд. Зөвхөн нийслэлийн найман дүүрэгт л 4.6 мянган биеэ үнэлэгч “ажилладаг” байх нь. Ихэнх нь буюу 31.5 хувь нь Баянгол дүүрэгт байдаг гэнэ. Мэдээж олонхи нь 18-24 насны залуус. Дан охид бүсгүйчүүд биеэ үнэлдэг гэж ойлгодог тал бий. Гэтэл судалгаагаар 18-20 насны эрэгтэйчүүд ч “үнэлдэг” болох нь тогтоогджээ. Хамгийн аймшигтай нь биөэ үнэлэгчдийн дотор 13-16 насны охид цөөнгүй орсон байна. Боловсролгүй, ажилгүй хүмүүс л энэ замыг сонгодог гэсэн тайлбар явж байдаг даа. Амьдрахын эрхээр хэмээн зөвтгөхийг яана. Тэгсэн бүр эсрэг дүн гарчихаж. Судлагдсан 4.6 мянгын бараг 90 хувь нь бүрэн дунд ба дээд боловсролтой, тэр ч бүү хэл магистр зэрэгтэй биеэ үнэлэгч ч байна. Сургуульд суралцдаг биеэ үнэлэгчдийн 79 хувь нь их, дээд сургуульд, 13.2 хувь нь коллежид, 7.8 хувь нь техникийн болон мэргэжлийн сургуульд суралцагсад байгаа нь анхаарал татна. Биеэ үнэлэх явдал өмнөх нийгмээс дамжин ирснийг батлах үзүүлэлт ч харагдана. Тал хувь нь 1-3 жил биеэ үнэлж байгаа бол зарим нь 26 дахь жилдээ гэж хариулсан байна. 4.6 мянгын 680 гаруй нь 14 наснаасаа эхэлсэн гэх нь цочирдмоор. Ийнхүү уг судалгаанаас манай өнөөдрийн нийгмийн олон гаж үзэгдэл болон хууль бус үйлдэл, залуу үеийнхний нэгээхэн хэсгийн дүр төрхийг харж болохоор. Нэг биеэ үнэлэгч өдөрт дунджаар гурван хүнд үйлчилдэг гэнэ. 15 настай хүүхдээс эхлээд 80 настай өвгөн хүртэл худалдаж авдаг тухай бүртгэгджээ. Гадныхан цөөнгүй үйлчлүүлдэг гэснээс бараг гуравны нэг нь Хятадууд, дараа нь Солонгосчууд байдаг аж. Судлах нэг хэрэг. Дараа нь яах вэ.

Олхонууд ШААБАР
“Өдрийн сонин”