ХААШАА НҮҮХ БОЛ…

Би гэдэг хүн гэр бүлээ хүнээс дутаахгүй авч явчих санаатай хэрэндээ л завгүй алба амьны ажлыг амжуулж гадуур дотуур бишгүй дээ л явж янз бүрийн хүнтэй уулзаж учирч явлаа. Өглөө намайг ажилдаа гараад явж байхад үе үе таардаг нэг хүүхэн байдаг юм. Тэр байнга түргэн түргэн алхаж яарч явна. Яарч явдаг болоод тэрүү орчныг анхаарах сөхөөгүй л чигээрээ харж явна. Миний хажуугаар хэд хэдэн удаа өнгөрсөн юм л даа. Түүнээс нэг л сайхан зөөлөн үнэр ханхийдэг. Зун болоод ч тэрүү тэр нэг л эмх цэгцтэй сайхан хувцаслана мөн ихэмсэг цаанаа л нэг нууцлагдмал.

Яагаад ч юм таарахгүй удахаар яасийн бол гэж хааяа бодно. Тэр ер нь гэр бүлтэй юм болов уу… Ажил их болохоор ч тэгс гээд л өнгөрнө. Орой гэртээ мөн амралтын өдрүүдээр гэрт өнжихөөр дээд айлын ядаргаатайг яана гээч. Үсэрч довхороод л хэзээ хэзээгүй л цөмрөөд ороод ирэх нүү гэлтэй. Өглөө бүр 7 цаг за заримдаа үүнээс ч эрт угаалгын машин нь ажиллаад л эхэлнэ. Бас тоос сорогч… Эхнэр ч дээд айлыг нэг зүхэж өгнө. Яаасан айл нь ийм байдаг байна аа гээд л. Уг нь энэ байрыг авах гэж байхад хамаатны эгч маань дээр нэлээн шуугиантай дэггүй хүүхдүүдтэй айл байдгийн тэрийг эс тооцвол тун дажгүй байр шүү гэж байсан юм. Арай хэтэрнээ гэж бодсон  үедээ би дээд айлын хаалга тогшиж анхааруулж хүртэл үзсэн юм.

Тэднийд 3 дэггүй хүүхэд тэднийг хардаг оюутан охин байдгийн. Намайг хараад нөгөө охин аргаа барсан байртай би хичээлээ тарж ирээд л эднийг харж байгаад ээж аавыг нь ирэхээр харьдгийн. Эд харин их дураараа ээж аав нь юу ч болоогүй юм шиг л сууж байдгийн. Одоо яахав дээ тэгж байгаад гайгүй болох байлгүй гэдгийн гэсэн. Эднийд яаж хүн тогтдог байнаа. Гэтэл нэг бүтэн сайны өглөө угаасан хувцас тагтан дээр тохоод тамхилаад зогсож байтал нөгөө хэдэн хүүхэд дээрээс ус асгаад тоглож эхэллээ. Нөгөө угаасан хувцас руу үсрээд… Эхнэр арай ч дээ чи орж загна гэлээ. Тэгээд эхнэрийн тушаалаар нэлээн ууртай хаалгыг нь нүдлээ.

Тэгсэн өглөө үе үе таардаг нөгөө хүүхэн утсаар ярьчихсан хаалгаа нээдэг юм байна. Цаана нь аав уу аав уу гэчихсэн 3 дэрчгэр юм. Тэгээд ямар зүгээр зогсоод байлтай биш танай хүүхэд ингээд байна гэлээ. Тэгсэн өнөөх хүүхэн өө тиймүү утсаар ярьж байх хооронд амжуулж л дээ эд гээд тэр хувцасаа аваад ир цэвэрлээд өгье. Ёстой уучлаарай, гэнгээ тэр харж байгаа биз та нар гэж хүүхдүүд рүүгээ хандаж хэллээ. Тэр энгийн нимгэн богино даашинзтай ард нь нөгөө угаалгын машин ажлаастай гал тогооноос хоолны үнэр цоргиод л бага нь 3 орчим насны хүүхэд гараас нь хөтлөөстэй нэг гартаа утсаа барьчихсан зогсож байсан.

Одоо болтол энэ төрх  харагдаад л. Тэр яаж ажил гэрээ амжуулдаг юм болоо. Хүүхдүүд нь ядаж томоотой бол ч… Маргааш өглөө таарлаа. Тэр гэрийн эзэгтэй өнөөх л янзаараа сайхан гэхдээ надад хандаж манай хэд зуслан гарсан байгаа чимээгүй байгаа биз гэж хэлэнгээ хажуугаар гараад яваад өглөө. Иймэрхүү байдлаар 2 жил өнгөрчээ. Тэднийх яг хэвээрээ. Хүүхдүүд нь арай том болсон байна лээ их сэргэлэн айхтар тархинууд бий.

Саяхан шөнө 3 цагын үед хаалга нүдээд. Хэн байдаг байнаа гээд очоод дурангаар шагайтал дээд айлын өнөөх хүүхэн. Хаалга онгойхгүй байна гээд зогсож байна. Би дотроосоо онгойлгох гэтэл онгойдоггүй. Гэтэл эхнэр араас ирлээ. Ямар хүүхэнтэйгээ яриад байгаан гээд. Тэгсэн нөгөө хүүхэн гэрээ андуурч түлхүүрээ чихээд наашаа ч үгүй цаашаа ч үгүй болгоод хана налаад зогсож байлаа. Нөхөр нь дээрээс бууж ирж хаалганаас түлхүүрийг салгаж манай эхнэрт баахан загнуулж аваад согтуу эхнэрээ түшээд аваад явлаа.

Нээрээ энэ дээд айл уу… Энэ хүүхэн бас ингэж уудаг байжээ. Ёстой юм юм амжуулах юмаа. Хэхэ манай эхнэр бол аль хэдийн боож үхсэн байхаа түүний оронд байсан бол. Гэртээ хааяа хоол хийх гэж бөөн юм болдог хүн чинь. Нээрээ сайхан хүүхэн шүү. Бас сайн эзэгтэй юм. Саяхан гадаа том хүү нь манайх эндээс нүүх гэж байгаа гэж ярьж байсан. Хаашаа нүүх юм бол… Би түүнийг хайрлаад бахархаад тэмүүлээд байна. Хүүхнүүд ийм байдаг бол ч. Би түүнтэй уулзмаар байна.