Зөвхөн үүнээс болоод намайг хаяад явна гэж байх уу?

Би одоо 40 нас хүрч байна. Залуухан 20-н хэдтэй их сургуулийн оюутан байхаасаа эхлээд л өдийг хүртэл нэгэн залууг дотроо нууцхан хайрлаж явсан юм. Гэтэл одоогоос 5 жилийн өмнө түүнийг эхнэрээсээ салсныг мэдээд, би гэдэг хүн ‘надад боломж олдлоо’ хэмээн хүүхэд шиг баярлаж билээ. Бид холбогдож, уулзаж учраад, миний зүгээс байж болох бүхий л хайр халамж, туслалцаагаа үзүүлж үнэхээр сайхан байсан.

Гэвч гунигтай нь, энэ жаргал маань хэсэгхэн зуур л үргэлжилжээ. Миний хайртай залуу маань өөрөөсөө нэлээд залуу, дөнгөж 26, 27-той өөр нэгэн эмэгтэйд дурлаж, нууцаар уулздаг байсныг нь би сүүлд мэдсэн юм. Тэр эмэгтэй нь нөхрөөсөө салаад удаагүй байхдаа манай хүнтэй танилцсан бололтой. Нөхрөөсөө асуухаар олигтой тайлбар хэлэхгүй, нууж хаагаад байхаар нь би судалж хайсаар байгаад тэр эмэгтэйн гэр бүл рүү болон тэр дурласан хүүхэн рүү нь ямар харилцаа холбоотой байгаагаа бүгдийг нь хэлж орхисон. Гэвч миний хайртай залуу намайг хаяад, тэр залуухан эмэгтэйг сонгоод явсан даа.

Дотроо ‘миний царай зүс, бие хаа гологдсон юм болов уу’ гэж өдөр шөнөгүй бодож шаналдаг. Би өөрөө махлагдуу биетэй, булцгар, мөн ганц хүүтэй эмэгтэй. Харин тэр залуухан бүсгүй 3 хүүхэдтэй хэрнээ гуалиг сайхан биетэй, царайлаг хүн байдаг юм. Зөвхөн үүнээс болоод намайг хаяад явна гэж байх уу?

Гэхдээ одоо хамгийн гол асуудал нь өөр зүйл байна. Намайг тэр эмэгтэйн гэр бүл рүү нь холбоо барьж дайрсан гэж өшөө авч байгаа мэт, одоо сар болгон танихгүй дугаараас болон өөр өөр сошиал хаягуудаас миний залуу насны өмнөх амьдралыг сөхөж, заналхийлсэн смс, DM, PM ирэх боллоо. Энэ байнгын дайралтаас болоод би шөнө тайван ч унтаж чадахгүй байна. Сэтгэл зүйн энэ аймшигтай дарамтыг яаж, хэрхэн шийдэж гарах вэ? Яавал дээр вэ, туслаач.