Хөхөө өөрөө хэрхэн шалгах вэ

Хөхөө өөрөө шалгах нь ямар ач холбогдолтой вэ

– Өөрийн биеийн нэг хэсгийг таньж мэднэ
– Хорт хавдартай бол эрт үед нь илрүүлж чадна. Хөхөө өөрөө шалгаснаар хөхний хорт хавдрын 80 хувийг анх оношлож болдог.

Хөхөө хэзээ шалгах вэ

Анх сарын тэмдэг ирсэн үеэс эхлэн шалгах нь зүйтэй. Ихэнх эмэгтэйчүүд усанд эсвэл шүршүүрт орж байх үедээ шалгаж байх нь дээр гэж үздэг. Учир нь савантай гөлгөр арьсан дээр ямар нэгэн өөрчлөлт мэдэгддэг байна. Сар бүрийн тогтсон нэг өдөр буюу сарын тэмдэг дууссанаас хойш 2-3 хоногийн дараа шалгах нь зүйтэй. Учир нь энэ үед хөх зөөлөрч, хэвийн байдалдаа орсон байх тул шалгахад хялбар байдаг. Цэвэршсэн эмэгтэйчүүдийн хувьд санахад амар, тодорхой нэг өдөр, эсвэл сарын эхний хоногийг сонгох нь зохистой.

Хөхөө өөрөө шалгах арга

Хөхний хорт хавдар нь хөхний булчирхай дотор хатуу, бэрсүү шиг зүйл үүсдэг. Үүнийг өөрөө маш хялбар шалгаж болдог.

1. Биеэ бүсэлхий хүртэл нүцгэлээд гараа ташаандаа авч толинд харна. Ингэхдээ хөхний хэлбэр, хэмжээ, өнгийг сайтар ажиглангаа хөхөн дээр ямар нэгэн хонхорхой, овгор, ургацаг эсвэл арьсан дээр ямар нэгэн өөрчлөлт байгаа эсэхийг харна.
2. Толины өмнө зогссон хэвээр гараа дээш өргөн хөх ба суганы хонхор хоорондын зай буюу хөхний хэсэг, нөсөөтэй хэсэг, хөхний товч хавиар шалгах хэрэгтэй.
3. Хөхний толгойг эрхий ба долоовор хураагаар зөөлөн чимхэж, ямар нэг зүйл, шингэн ялгадас гарч байгаа эсэхийг үзнэ.
4. Хурууны өндгөөр хөхний толгойг тойруулан тойрог маягаар эсвэл шулуун шугамаар, эсвэл од маягаар төвөөс захруу гурван чиглэлийн аль нэгийг сонгож, иллэг хийж болно.
5. Хэвтээ байдлаар зүүн гараараа тохиогоороо нугалан дээш өргөнө. Баруун гарын хурууны өндгөөр зүүн талын хөхийг зөөлөн тэмтэрч үзнэ. Хэрэв та өрөөсөн хөхөө хангалттай шалгасан гэж үзвэл нөгөө талынхаа хөхийг дээрх байдлаар шалгана.

Хөхөндөө үзлэг хийхдээ дараах өөрчлөлт байгаа эсэхийг сайтар тодруулна.

• Янз бүрийн бэрсүү тэмтрэгдэх
• Хөхний арьс улайж барзайх
• Хөхний аль нэг хэсэгт хэлбэр нь өөрчлөгдөн арьс хонхойх
• Хөхнөөс цусархаг болон идээрхэг ялгадас гарах
• Хөхний товч татагдан цааш хонхойх зэрэг шинж тэмдэг илэрвэл мэргэжлийн эмчид хандах хэрэгтэй.