Хятад жил бүр 13 сая үр хөнддөг

Хятадын “Нэг гэр бүл – нэг хүүхэд” бодлогоор жилд 13 сая үрийг хэвлийд нь устгадаг байна. Хэдийгээр эдийн засаг нь эрчимтэй өсч байгаа ч хүн амын тоог хязгаарлах хатуу бодлого нь хэвээр байгаа юм. Учир нь гэрлэсэн хосуудад нэгээс илүү хүүхэдтэй болохыг хуулиар хориглосон хэвээр. Хүний эрхийг зөрчсөн энэ хуулыг Хятадын гэр бүл төлөвлөлтийн хорооны ажилтнууд хэрэгжүүлдэг аж. Аль Жазира телевизээр саяхан хүүхэд төрүүлэх эрхээ хасуулсан нэгэн эмэгтэйн тухай нэвтрүүлэг гарсан.

Хятадын зүүн өмнөд мужид амьдардаг Xiao Aiying гэгч бүсгүйг найман сартай жирэмсэн байхад нь гэр бүл төлөвлөлтийн хорооноос хүчээр үрийг нь хөндүүлжээ. Бүсгүй арван настай охинтой болохоор дахин хүүхэд төрүүлэх эрхгүй болсон юм. Хүний эрхийг ноцтой зөрчсөн уг хуулинд дахин хүүхэдтэй болох гэсэн хосуудыг 40 мянган ам доллараар торгох, ажлаас нь халах, хөрөнгийг нь хураах зэрэг итгэхийн аргагүй заалтууд байдаг аж.

Жилд 13 сая үр хөндөлт гэдэг нь аймшигтай сонсогдож байхад Хятадын эрүүл мэндийн мэргэжилтнүүд бодит байдал дээр энэ үйл явц бүр илүү цочирдмоор гэж ярьжээ. ДЭМБ-аас гаргасан мэдээгээр 15-44 насны нэг мянган хятад эмэгтэй бүр дунджаар 24 удаа үр хөндүүлдэг аж. 2004 онд дэлхийн хэмжээнд 42 сая үр хөндүүлсний 9 сая нь Хятадад болжээ.

Хэдийгээр Хятадын албаны зарим хүмүүс хүн амын тоог хязгаарлах энэ бодлогоо эргэн харах тухай ярьж эхэлсэн ч тус оронд юу ч өөрчлөгдөхгүй байна. Хятадын хөдөө тосгонуудад албан хүчээр үр хөндөлт хийх нь байнга тохиолддог болж, орчин үеийн иргэншсэн нийгмийн өдөр тутмын амьдралын хэв маяг болжээ. Засгийн газар нь уг хуулыг хүчингүй болгох хүртэл олон сая бүсгүй үрээ хөндүүлэх болно.

Xiao Aiying бүсгүйд ч ийм зүйл тохиолдсон юм. Энэ сарын арванд хөл хүнд бүсгүйг төрөхөд ердөө ганцхан сар дутуу байхад гэр бүл төлөвлөлтийн ажилтнууд хорьж саатуулан үрийг нь хөндүүлжээ.

Бүсгүйн нөхөр Luo Yanquan тэр өдөр арав гаруй хүн эхнэрийг нь гэрээс нь орилж чарлуулан хүчээр авч явсан тухай ярьж байна. Түүнийг эмнэлэгт гурав хоног хорьж, үрийг амьгүй болгох эм бүсгүйд уулгажээ. Бүсгүйд тохиолдсон энэ явдлын талаар гадаадын хэвлэл мэдээллээр цацагдахад Хятадын албаны хүмүүс үүнийг эрс няцааж, худал мэдээлэл гэж тайлбарласан юм. Тэд бүсгүйг үр хөндүүлэх шийдвэрийг өөрөө гаргасан гэсэн билээ.

” Манай гэр бүлийнхнээс хэн ч ийм шийдвэр гаргаж зүрхлэхгүй. Бид нар цагдаа дуудсан боловч тэд “ Энэ хэрэг бидэнд хамаагүй” гэж хэлсэн. Бид өмгөөлөгчид хандахад “ Тусалж чадахгүй”, хэвлэлийнхэнд хэлэхэд “ Ийм хэргийг бид мэдээллийн хэрэгслээр цацахгүй” гэсэн гэж бүсгүйн нөхөр ярьжээ.

Эцэст нь бүсгүйн жирэмсэн байсан үеийн гэрэл зураг, биедээ зодуурын сорвитой эмнэлэгт байх үеийнх нь зураг Аль Жазира вэб сайтаар цацагдсанаар энэ хэрэг илчлэгджээ. Бүсгүйн түүх Хятадад болж туйлын харгис үйл явдлын зөвхөн нэг жишээ юм.

О. Халиун
NEWS.MN